2Th 2 | MED | STEP | Nuim Jisas Kraist yant wangga, tᵾn mondᵾp pili wamp mbᵾ pora, elim kᵾn mbun mou tenda ila muⱡmin uⱡ ei, angmᵾn, na ndi, enim ronduⱡ mundᵾp waldᵾp nᵾnt. Ei, enim wamp na ti ndi, ik pai nomba muna, wote tᵾn ndi, ya mon rop ngurmᵾn nimbila nga tila ik ti pepa mel, Jisas nga omba ui ni kor, ekit om nᵾk pilik, enim nga numan orunga mepa ᵾndi nᵾndangga, mon!

2 Thessalonians 2

Uⱡ Kit Etᵾm Wu

1 Nuim Jisas Kraist yant wangga, tᵾn mondᵾp pili wamp mbᵾ pora, elim kᵾn mbun mou tenda ila muⱡmin uⱡ ei, angmᵾn, na ndi, enim ronduⱡ mundᵾp waldᵾp nᵾnt. Ei, enim wamp na ti ndi, ik pai nomba muna, wote tᵾn ndi, ya mon rop ngurmᵾn nimbila nga tila ik ti pepa mel, Jisas nga omba ui ni kor, ekit om nᵾk pilik, enim nga numan orunga mepa ᵾndi nᵾndangga, mon! 3 Wamp ti, kandᵾk kont tangina, enim tᵾpa, tiki pindi nᵾpᵾndangga, mon! Jisas omba ant ei, unt ekit ui nᵾwangga, wamp minal Got kᵾn tᵾk mbuⱡ ngangina, wote uⱡ kit mbᵾ nga puⱡ wu, ndip kona tᵾmba wu ei omba, ui ei kᵾn, ku mot nimba. 4 Ei kᵾn ku, wamp nga uⱡ kai mat etᵾk, Got nga mbi paka rondᵾk eng uⱡ mbᵾ, mon nimba, kumba pendᵾmba. Elim nga mbi paka ropa mepa oⱡa mba, wote Got nga manga wingti ou ila mukᵾr mba, elim Got mor nimba ila moⱡmba ku.

5 Enim pilik mbi ndonmin muna mon? Ya uⱡ mbᵾ, na enim kᵾn rᵾp rop murmᵾn ei kᵾn, enim kundᵾp nᵾmp pora ndur. 6 Uⱡ kᵾⱡ, akup ui ila ekit oⱡnga ei, wote mel ti ndi imp monum ei, enim pilik mormin. Wu kit ei, Got ndi, ui ngum tila mint mot nimba. 7 Uⱡ kit mo ropa tetᵾm mbᵾ, kongun elinga mel enim. Wote, nᵾnt uⱡ mbᵾ, unt ekit ui nawᵾmba, imp monum wamp ei ndi, ambuⱡpa mint muⱡangga mba, wu kit ei, tᵾnggᵾt tᵾk mundung ei kᵾn, wu kit ei, kuimp tepa mot nangga kᵾn, wote Nuim Jisas yant omba. Wu kit ei, Nuim Jisas elim nga keta muⱡnga ei ndi, ropa kondpa, wote elim nga uⱡ rᵾⱡang pi mepa om ei ndi, wu kit ei, ama uⱡ nga kᵾnt nga ropa etpa, kit mondᵾmba. 9 Wu kit ei, Seitan nga ronduⱡ ei, tᵾpa mepa omba, uⱡ rᵾpndi elpa elpa mat etpa, wote wamp kit muⱡing mbᵾ, uⱡ rᵾpᵾndi kol ropa mbᵾ, ou ndupa ora ndumba, wamp kit muⱡing. Ei nambuⱡ emel, Got nga uⱡ kupa, en enim etpa tᵾmba uⱡ kun mbᵾ, numan nguk rukᵾr ti natᵾtᵾng. 11 Uⱡ puⱡ ila nga, Got ndi, uⱡ kol mbila pep rormᵾn wamp mbᵾ, pilik kelik pep reing nimba, ronduⱡ ti, wak rondᵾmba. 12 Itangga kᵾn, punt ropa ngumba uⱡ ei, uⱡ kit mbᵾ, numan nguk pilik kelik eng wamp mbᵾ, kit muⱡing.

Enim Ronduⱡ Puk Got Kᵾn Muⱡᵾi!

13 Angmᵾn, Nuim ei ndi, enim numan ngorum ei nga, tᵾn Got kᵾn rᵾk rᵾk angge nᵾtmin. Ei nambuⱡ emel, Got ndi, etpa ti uⱡ ila, enim kuimp tepa rukᵾr titim. Wote, enim nga mondpa pili orunga mek puk, uⱡ kupa mbila tetᵾng ei, Muⱡnga Wingti nga ronduⱡ ila, enim etpa, Got nga wamp wingti kᵾⱡ, mondᵾmba pilpa itim. 14 Tᵾn, Got nga Rᵾnang Ik Kai ei, enim nimbun ngurmin nila, Got ndi, enim wi ropa titim. Wote, Nuim Jisas Kraist nga uⱡ eng nui kai tetᵾm mbᵾ, enim elpa elpa mok rok, tᵾk ᵾmbᵾⱡeing nimba itim. 15 Ei kᵾn, angmᵾn! Ya tᵾn mon rop ngunmᵾn ila kep, wote unt ik mbo inditmin nimbila kep, en enim nga mondpa pili orunga, ronduⱡ puk molk, uⱡ kupa mbᵾ, ambulk gi ndᵾi!

16 Tᵾn nga Nuim Jisas Kraist elim kᵾn, Wuta Got tᵾn numan ngumba. Wote, elim nga wamp poⱡ ti uⱡ ila, tᵾn uⱡ nga kᵾnt nga kont mul uⱡ ei, tᵾmin nimba ronduⱡ ngurum wu ei ndi tangga, enim keⱡ rundi rundi molk, enim nga numan orunga, etpa ronduⱡ mundangga, ik kai mbᵾ nᵾk, uⱡ kai mbᵾ, etᵾk mek pᵾi!